የዘንድሮው የአሜሪካው የጣልያን ጥናቶች ማኅበር ዓመታዊ ጉባኤውን ያካሄደው ከግንቦት 26 እስከ 28 ድረስ ሳሳሪ በምትባል የሳርዲኒያ(ጣልያን) ከተማ ውስጥ ነው። መዘክር ከሰሜን አሜሪካ ዩኒቨርሲቲዎች የጣልያን ጥናት ክፍሎች የተውጣጡ ምሁራን፣ ተመራማሪዎች፣ አስተማሪዎች እና ተማሪዎች በተገኙበት በዚኽ የሦስት ቀናት ጥናታዊ ጉባኤ ማጠቃለያ ላይ ንግግር እንዲያደርግ ተጋብዞ ነበር። በዚኽም መሠረት የመዘክር አስተባባሪ ኮሚቴ አባላት በስብሰባው ላይ ተገኝተው ንግግር አድርገዋል። አለመረጋጋት፣ እንክብካቤ እና ነፃነት ጉባኤው ያተኰረባቸው ሦስት ጭብጦች መዘክርም ትኲረት የሚሰጣቸው ጉዳዮች ናቸው። በተለይ አለመረጋጋት፤ ቁስን ወይም ሥነ ልቡናን የሚነካ፣ የደህንነት መጥፋትን ወይም አስተማማኝነት ማጣትን የሚመለከት እንደመኾኑ መጠን፤ ከቤታቸው ከሀገራቸው በግድ ሩቅ ተወስደው የታሠሩ ብዙ ኢትዮጵያውያን ከገጠማቸው እና ካለፉበት ኹኔታ ጋራ በእጅጉ ይመሳሰላል። በሚያሳዝን መልኩ በኢትዮጵያውያን ላይ የደረሰውን ኹኔታ በሚመለከት ያለው መረጃ እጅግ አነስተኛ ነው፡፡ በጣልያኑ ዓመታዊ ጉባኤ ላይ በአያትና ቅድመ አያቶቻችን ላይ የደረሰውን መከራ፣ በብቸኝነትና በስደት ያሳለፉትን ጊዜ እንዲኹም ትተዋቸው ስለሄዱት ልጆች እና ሌሎችም ሕይወት ለመረዳት ስለምናደርገው ጥረት እና ስለምንሠራው ሥራ ለማስረዳት ችለናል።

በግንቦቱ ጉባኤ የነበረን ሌላኛው መርሐ ግብር፤ የዛሬ ዓመት በመጀመሪያው የአዚናራ ጉዟችን ወቅት አግኝተናቸው የነበሩትን ጣልያናዊ አጋሮቻችንንና ሌሎችንም በማግኘት፤ ስለ ሥራችን ወቅታዊ መረጃዎችን ማካፈል ነበረ፡፡ በዚህም መሠረት ከአዚናራ ብሔራዊ ፓርክ አስተዳደር፣ ከሲላንድ አዚናራ አከባቢ የታሪካዊ አስጎብኚ ድርጅት፣ ከስቲንቲኖ ከንቲባ፣ ከሳሳሪ ከተማ ምክር ቤት ተወካይ እና ከሌሎችም ጋር ሰፊ ውይይት አካሄደናል፡፡ በውይይታችንም፤ ባለፈው ዓመት ካደረግነው የመጀመሪያው የአዚናራ ጉብኝታችን በኋላ በነበረው ጊዜ ውስጥ ስለ ሠራናቸው ሥራዎች፤ ማለትም፤ ሕጋዊ ዕውቅና ያለው ለትርፍ ያልተቋቋመ ድርጅት መመሥረታችንን፣ ስለእያንዳንዱ እስረኛ መረጃ የመዘገብ እና የሕይወት ገጽታን በትክክል ማሳየት የሚችል ድንቅ ድረ ገጽ መሥራታችንን፣ በሦስት የተለያዩ ቋንቋዎች የሚቀርቡ አራት በደንብ የተጠኑ የዜና መጽሔቶችን ማዘጋጀታችንን በመግለፅ ምን ያህል የመሥራት አቅም እንዳለን ማሳየት ችለናል። አጋሮቻችንም፤ እስካሁን ያለውን ተግባርና ጥረት ባግባቡ ተረድተው ሥራችንን በመደገፍ እ.ኤ.አ. በ1937 አዚናራ ውስጥ ታስረው ለነበሩት ኢትዮጵያውያን ቋሚ መታሰቢያ ሊቆምላቸው የሚችልበትን መድረክና ኹኔታ ለማመቻቸት ቃል ገብተውልን ተሰነባብተናል።

የመዘክር አስተባባሪ ኮሚቴ አባላት በዚህ አጋጣሚ፤ ለልጅ ኃይሌ ወልደ መስቀል በተዘጋጀ የመታሰቢያ ሥነ ሥርዓት ላይ የመገኘት ዕድል አግኝተዋል። ልጅ ኃይሌ ወልደ መስቀል የኤልፊ ኑቬሎን ቅድም አያት ሲኾኑ ታስረው የነበረው፣ ሕይወታቸው ያለፈውና ቀብራቸው የተፈጸመው ጣልያን ሳሳሪ ውስጥ ነው። የልጅ ኃይሌ መታሰቢያ እንዲመረቅ የተደረገው በኢጣልያ ወረራ ወቅት የተጠቃን አንድ ቤተሰብ ለመዘከር ታስቦ ሲኾን ሥነ ሥርዓቱም በኢትዮጵያ ኦርቶዶክስ ተዋሕዶ ቤተ ክርስቲያን ካህን ፀሎት የተመራና የአካባቢው የኢጣልያ ባለሥልጣናትም የተገኙበት ነበር።

መዘክርም በበኲሉ ከጣልያን ወረራ ጋራ በተያያዘ ለመከራ፣ ለሥቃይ፣ ለሞት እንዲኹም ለንብረት ውድመት የተዳረጉ ቤተሰቦችን በሙሉ የሚዘክር መታሰቢያ የማኖር ዕቅድ አለው። በአዚናራ ቋሚ መታሰቢያ እንዲኖር የሚደረገው ጥረትም የዚሁ ዐላማ አካል ነው። የሳሳሪውን ጉዟችንን የሚያሳይ አጭር ቪዲዮ በዚህ ማስፈንጠሪያ ይገኛል።